A asociación ecoloxista Vaipolorío desenvolveu este luns unha xornada de traballo conxunto de usuarios de Down Pontevedra "Xuntos" para eliminar herba da pampa (Cortaderia selloana) do río Gafos, coñecido tamén como Tomeza.
Segundo explicou Xosé Feijoo, portavoz de Vaipolorío, a actividade céntrase na retirada dos plumachos desta especie invasora para evitar que a semente se propague polo vento.
"Estamos nun momento no que imos sacar os plumachos. Despois haberá unha segunda fase que será arrincar a planta de maneira manual, as pequenas, e despois con mecánica para retirar as grandes", detallou.
Esta colaboración refórzase tras a sinatura dun convenio entre ambas entidades o venres pasado. "Xa tiveramos algunha colaboración conxunta coa asociación Xuntos pero agora refórzase. Haberá máis actividades con eles nas que poidan participar", sinalou Feijoo.
O portavoz de Vaipolorío recoñeceu que a herba da pampa, malia estar catalogada como especie invasora, "ten unha certa elegancia, un certo porte" e segue a venderse comercialmente. "Ata que non haxa un labor intenso de información e divulgación sobre esta especie invasora será difícil que desapareza", advertiu.
No río Gafos, a presenza desta planta procedente de América do Sur non é moi abundante na zona accesible, pero si constitúe un problema na contorna da vía do tren e en terreos particulares onde se necesitan permisos para realizar limpezas.
Durante a xornada, os participantes percorreron o sendeiro tras a campaña de limpeza de verán realizada por Vaipolorío para coñecer outras diferentes especies vexetais da zona, como o lúpulo ou o loureiro.
O sendeiro do río Gafos presenta outras especies invasoras que supoñen un desafío para os ecoloxistas. Entre elas destaca principalmente a Tradescantia Zebrina, coñecida en castelán como "Amor de hombre", que segundo Feijoo resulta "imposible" de eliminar malia os proxectos desenvolvidos pola asociación.
"Somos incapaces, case renunciamos a eliminala. Témola asumida", recoñeceu o portavoz, quen comparou a situación coa da pataca, que inicialmente era invasora pero acabou por ser aceptada.
Pola súa banda, a presenza de eucalipto na zona do Espacio Natural de Interese Local (ENIL) é "moi pouca" e "non é moi preocupante", segundo as observacións de Vaipolorío.
En canto á fauna, Feijoo sinala que, malia "os ataques que sofre o río case a diario", seguen a observarse londras en distintos puntos do leito do Gafos.
