A parroquia de Viascón xa o ten todo listo para celebrar unha das súas xornadas máis animadas do ano. Este sábado, 11 de abril, o campo de fútbol será o punto de encontro de veciños e visitantes nunha nova edición da Feira de Abril, unha cita que mestura tradición e lecer.
O alcalde de Cerdedo-Cotobade, Jorge Cubela, presentou o programa xunto á comisión organizadora, destacando o formato aberto e participativo do evento. A idea, explicou, é ofrecer actividades para todos os públicos e converter a xornada nun espazo de convivencia que tamén atraia a xente de fóra.
A festa arrincará pola mañá, ás 10:00 horas, cunha ruta cabalar que partirá desde o Mosteiro de Tenorio e chegará até Viascón. Ao mediodía, ás 13:00 horas, a música tomará protagonismo cunha actuación de sevillanas, antes de dar paso ao xantar popular, ás 14:00 horas, onde non faltarán pratos tradicionais como o churrasco, acompañado de pan, bebida, sobremesa e café.
Pola tarde, o ambiente seguirá crecendo con propostas como unha xincana cabalar, un concurso de touro mecánico con premio para quen máis resista e unha exhibición ecuestre ao estilo Golega, que fortalece o vínculo coas tradicións.
A partir das 18:00 horas comezarán as entregas de premios, incluíndo o recoñecemento ao mellor vestiario, pondo en valor o ambiente festivo que caracteriza esta feira.
A xornada continúa pola noite: ás 21:00 horas haberá cea popular e, como broche final, unha verbena amenizada por Disco Móbil Deluxe, encargada de pór ritmo até o final.
Desde a organización lembran que é necesario comprar con antelación os tickets para a comida e a cea nos puntos de venda habilitados. Ademais, os máis pequenos tamén terán o seu espazo con colchóns para gozar durante toda a xornada.
Os prezos varían: 18 euros pola comida ou un pack de comida e cea por 30 euros; o prezo para menores de 10 anos será de 10 euros. Todas as persoas que queiran comprar con antelación poderán achegarse aos puntos de venda habilitados: Bar Manolo, Bar A Chan, Bar Amoedo e Carnicería O Agro.
Cubela finalizou comentando: "Apostamos por un evento completo, no que se combinan actividades ecuestres, música, gastronomía e tradición, creando unha experiencia única para veciños e visitantes".