O Concello de Vilagarcía puxo en marcha este venres a campaña de sensibilización "Vilagarcía con Palestina", unha iniciativa coa que se busca trasladar á cidadanía a gravidade da situación que vive a poboación civil na Franxa de Gaza e reclamar a implicación da comunidade internacional.
O acto arrincou co izado da bandeira palestina no balcón da Casa Consistorial, no que participaron o alcalde, Alberto Varela, membros do BNG e un numeroso grupo de veciños.
A campaña inclúe tamén unha recollida de firmas na praza de Galicia, que se desenvolverá durante a tarde deste venres de 18.00 a 20.30 e na mañá do sábado de 11.00 a 13.30 horas, así como a distribución de pancartas coa lema da iniciativa para que poidan ser exhibidas en vivendas e comercios.
O alcalde destacou que "a política ten que marcar as prioridades, e hoxe a prioridade debe ser parar o xenocidio en Gaza". Varela cualificou a situación de "masacre" e recalcou que "a comunidade internacional ten que facer forza para detela".
A veciña Vicky Seijas, portavoz da plataforma cidadá que impulsou a campaña, lembrou que a iniciativa xurdiu "tras as últimas declaracións de Netanyahu, deixando claro que non ía parar até arrasar con todo". Engadiu que os participantes senten a necesidade de "dar a batalla", porque "non queremos ser partícipes do que está a pasar en Palestina".
Desde o BNG, Xabier Rodríguez denunciou que "o que está a suceder é un xenocidio premeditado que busca facerse co control do territorio", trasladando a solidariedade da formación coa poboación gazatí.
Durante o acto celebrouse a lectura do manifesto, no que subliñan que "non podemos permanecer en silencio mentres se comete un crime contra a humanidade á vista de todos". O texto asegura que Gaza vive "unha das ofensivas máis brutais da historia recente, con bombardeos indiscriminados sobre hospitais, escolas e vivendas" e alerta de que o bloqueo israelí "impide a entrada de medicamentos, alimentos e axuda humanitaria, condenando a familias enteiras á inanición".
No manifesto denuncian expresamente a ocupación militar israelí, que nega a Palestina o dereito a vivir libre na súa terra; o xenocidio en curso, que viola os principios do dereito humanitario internacional; o bloqueo da axuda humanitaria, que consideran un "crime de guerra", así como os ataques contra cooperantes, sanitarios e xornalistas que traballan na zona.
Ao mesmo tempo, demanda un cesamento do fogo inmediato e permanente, a entrada sen restricións de axuda humanitaria e o fin da ocupación israelí dos territorios palestinos.
Os promotores da campaña concluíron que Vilagarcía quere facerse ouvir "comprometida coa xustiza, a paz e os dereitos humanos" e que este é un xesto para reafirmar a súa solidariedade con Palestina.
Non é a primeira vez que o goberno local manifesta publicamente o seu apoio ao pobo palestino. Xa en maio de 2024, o pleno municipal aprobou unha moción de condena dos ataques contra a poboación civil, e o Concello colaborou na presentación do libro "Ojos de Palestina", do médico residente na cidade Anan Abdalah.