Vilagarcía e Urbaser lanzaron unha nova campaña de sensibilización para eliminar os problemas que xeran os ouriños de cans en espazos e mobiliario públicos.
A iniciativa inclúe a repartición de máis de 1.000 depósitos de man para levar auga coa que lavar o pis.
A campaña presentouse este martes no xardín de Ravella, onde se puido constatar a corrosión que os ouriños provocan en báculos de iluminación, farois, semáforos, sinais de tráfico, papeleiras e soportes de bancos.
A concelleira de Servizos, Tania García, destacou que isto xera un custo anual para o Concello, ao verse obrigado a cambiar elementos que non se poden arranxar e, ademais, pór en risco a estabilidade de estruturas que poden partir e alcanzar a alguén.
Neste sentido, García lembrou que xa se produciron caídas de sinais e semáforos por esta causa, sen danos persoais.
Xunto a García compareceron Ánxela Chenlo, responsable da campaña por parte de Urbaser, e Anxos Cifuentes, presidenta da Protectora de Animais. Todas coincidiron que o ideal é levar sempre o recipiente con auga para lavar o pis e, se é posible, engadir unhas pingas de vinagre ou xabón para diluílo mellor.
"Trátase de xestos moi sinxelos que, ademais de contribuír ao estado de limpeza e a imaxe da cidade, facilitan a convivencia", dixo García.
A medida tamén pretende acabar coa práctica de colocar botellas ou garrafas de auga en portais ou entradas de comercios para evitar que os animais ouriñen nelas.
"É algo que ven obrigados a facer e que non queda nada ben. Aquí un comerciante tivo que azulexar os baixos da porta por converterse nun meadero de cans. Isto pódese evitar cun pouquiño de colaboración", sentenciou a edil.
A Protectora de Animais repartirá os recipientes entre as persoas que adoptan animais do refuxio municipal e nos seus mercadillos.
Tamén se poderán solicitar ao persoal de Urbaser ou nas cinco xornadas de sensibilización que realizará a empresa en distintas zonas do centro urbano, especialmente no paseo marítimo, praias da Concha-Compostela e parques caninos.
A campaña complementarase con carteis informativos nos parques de Fexdega, O Piñeiriño, O Carril e a praia do Castelete.