A casa do Señor Scrooge, as pantasmas do Nadal pasado, presente e futuro e unha tenda de xoguetes antigos son algún dos elementos que formarán parte da Aldea de Nadal que Vilagarcía abrirá na Rúa Clara Campoamor entre o 19 de decembro e o 5 de xaneiro.
Todo este espazo urbano converterase nunha rúa inglesa da época vitoriana, que terá como elemento inspirador o Conto de Nadal de Charles Dickens.
Será grazas á decoración da firma local, Arousa Casa, e á dinamización da compañía de Nelson Quinteiro, que non dubidou en caracterizarse como a pantasma do Nadal presente para presentar esta iniciativa.
O seu director levaba posta este mércores unha vestimenta similar aos 60 traxes confeccionados para as persoas que dinamizarán Vilagarcía durante o Nadal, tanto na aldea como no resto das rúas do centro da cidade.
E é que a Rúa Clara Campoamor será o epicentro, pero a Aldea de Nadal tamén fará unha chiscadela ao conto de Dickens con decoración na Praza da Independencia e na Praza da Peixería, un recinto no que se desenvolverán as actividades destinadas ao público máis cativo.
Tamén na Peixería haberá unha tenda de xoguetes antigos na que as persoas maiores poderán recordar a súa infancia e os cativos saber que hai divertimento máis alá nas novas tecnoloxías.
As casetas para a venta de produtos típicos do Nadal instalaranse en Clara Campoamor. Serán oito casetas, unha delas totalmente decorativa e as sete restantes para os comerciantes que as soliciten. O prazo de inscrición remata o 12 de xaneiro e o uso é de balde.
Vistosos espectáculos, a interpretación coral da panxoliña Noite de Paz con piano de cola para a inauguración e actividades para toda a familia completarán a ampla programación nesta Aldea de Nadal para as festas máis entrañables do ano.
Tras a boa acollida nas anteriores edicións, o goberno municipal quixo cambiar o seu emprazamento e darlle unha temática condutora "para facela diferente e continuar engadindo atractivos que animen, non só aos vilagarciáns a gozar dela, senón tamén a atraer visitantes".