A Asociación Española contra o Cancro (AECC) espera reunir máis de 300 persoas na súa tradicional cea baile que celebrará o próximo 24 de xullo, a partir das nove da noite, no parque do Liceo Casino na Caeira.
Este evento solidario, que constitúe unha das principais fontes de financiamento desta asociación, cumpre este ano o seu vinte aniversario.
A cea-baile contará con música en directo e completarase cunha tómbola na que colaboran os comerciantes de Pontevedra e Marín, achegando preto de 800 regalos que serán sorteados durante o evento.
En canto aos produtos cos que se elaborará a cea, estes serán doados como cada ano por diferentes empresas do sector hostaleiro.
A finalidade deste evento é a recadar fondos para axudar a subvencionar os distintos programas e servizos cos que conta actualmente a asociación: atención social, axudas económicas, atención psicolóxica, atención a enfermos en fase terminal, investigación ou o programa de prevención en centros escolares.
Durante o acto farase entrega de tres distincións "V de vida", a distintas personalidades e empresas pola súa iniciativa solidaria a favor da AECC.
A cea, que terá un custo de 30 euros, pode reservarse a través do teléfono 986 86 52 20, do correo electrónico pontevedra@aecc.es ou acudindo directamente á sede provincial da AECC, no número 9 da rúa González Besada.