Xa está aquí o Carme de Marín, "unhas festas para vivilas, para sentilas e para cantalas"

As letras do grupo de cantos de taberna 'Os Saljariteir@s' deron na noite deste venres o pistoletazo de saída ás Festas do Carme de Marín, uns festexos que comezaron o xoves coa Batalla de Flores e que encherán a vila de alegría até o día 16. 

Os pregoeiros deron a benvida á semana grande de Marín cun vídeo e coas súas cancións ante unha Alameda ateigada de autoridades civís e militares e de veciños e veciñas da localidade. 

A continuación, tomou a palabra a alcaldesa, María Ramallo, que destacou que as do Carme de Marín son "unhas festas para vivilas, para sentilas e para cantalas, como este espectacular pregón que acabamos de vivir da man dos Saljariteiros".

Destacou Ramallo que sempre é difícil escoller pregoeiro ou pregoeira nun pobo cheo de "xente da que sentirnos tremendamente orgullosos", pois "a lista de todas as persoas que poderían ser idóneas para abrir as festas grandes é longa".

Referiuse aos escollidos este ano e deulles as grazas "por poñerlle ás Festas do Carme o mellor dos inicios posibles", pois o seu pregón "foi un reflexo exacto do que sodes: alegría, amizade, comunidade, cultura popular, sentido de pertenza e… sobre todo… orgullo de Marín".

"Levades Marín alá a onde ides. Sodes uns embaixadores inigualables, porque ademais, grazas ás vosas voces e alegría, o nome de Marín vai sempre unido á positividade e á forza, dúas características que nos definen", destacou a alcaldesa.

Durante a súa intervención fixo unha chamada á "afouteza" e lembrou que Marín é "pobo de mar, de xente que loita, que traballa, que se levanta día a día para saír adiante e seguir camiñando" e, nestes días de festas, animou a gozar, a xuntarse cos que están todo o ano e cos que veñen de vacacións, a gozar das rúas e prazas. 

Non esqueceu que Marín se viste de gala para honrar á Virxe do Carme, a patroa da vila e tamén dos mariñeiros e da Armada, e que o mar é "a nosa gran fortuna, o noso gran tesouro" e un traballo "duro, arriscado e que, como ben sabemos aquí, tristemente deixou a moitos atrás".

Tivo palabras de recordo para todos os falecidos no mar e tamén para a Princesa Leonor, que o luns será nomeada Filla Adoptiva de Marín.

E, para rematar, como última petición, dixo María Ramallo: "Hoxe máis que nunca, é importante que mostremos todo o que somos".