Unha delegación da Escola de Xadrez Pontevedra inicia este xoves unha nova viaxe ao campamento de refuxiados sirios de Azraq, en Xordania, levando unha importante achega de material xadrecístico e educativo. Atendendo a recomendación feita por Unicef, que traballa neste campos de xeito continuado, nesta ocasión recadaron libros de aprendizaxe de inglés.
Xadrez Pontevedra, coa colaboración do Concello de Pontevedra, desenvolve desde o ano 2016 un proxecto solidario en Azraq que ten como obxectivo fomentar o xogo, a integración e convivencia dos menores que alí viven a través deste deporte.
O fomento do xadrez como actividade educativa e social faise coa entrega de material (manuais, taboleiros, etc..), formación de monitorado para que a actividade se manteña, e apoio loxístico e asesoramento continuado.
Ademais a Escola Xadrez Pontevedra ten adquirido un compromiso de divulgación e concienciación da realidade que están a vivir os sirios refuxiados en Xordania
A viaxe estenderase até o 1 de abril, tempo no que avaliarán o desenvolvemento do proxecto, profundarán na formación e xestión. A súa diana son 600 nenos e nenas de 9 a 12 anos e 300 rapaces e rapazas de 12 a 18.