Cinco son finalmente os candidatos aos Premios Cidade de Pontevedra. Aos xa coñecidos do padexeiro ÿscar Graña, o avogado Javier Munáiz Puig e o Club Cisne Balonmano uníronse outras dúas candidaturas nas últimas horas. Trátase do historiador Xosé Fortes e do Rotary Club. Optan ao Teucro de prata e ao diploma co que se recoñece a aquelas persoas físicas e xurídicas que desenvolvan un labor de especial proxección para a cidade.
No caso do historiador Xosé Fortes, candidatura presentada pola Federación de Asociacións de Veciños Teucro, é coñecido principalmente polo seu labor pedagóxico. Entre outros fitos, foi director de Vagalume, a primeira revista infantil e xuvenil en galego e coordinador en Pontevedra dos cursos de verán da UIMP. ÿ autor de numerosas publicacións sobre a historia da cidade.
Os seus 'rivais' para a obtención do premio serán o padexeiro ÿscar Graña, proposto pola Federación Galega de Piragüismo e o avogado Javier Munáiz Puig, apoiado pola delegación de Pontevedra do Colexio Oficial de Arquitectos de Galicia.
Pola súa banda, o Rotary Club é unha asociación que agrupa a líderes empresariais e profesionais da cidade que proporcionan servizo humanitario a través de diferentes programas e proxectos. En 2013 cumpriron as súas vodas de prata. No seu caso, a candidatura foi presentada por Cáritas e conta co apoio de Aempe, a Asociación Xuntos e AFAPO, a Asociación Familiares de Enfermos de Alzheimer.
O outro candidato na categoría de persoas xurídicas é o Club Cisne Balonmano, que celebra o seu cincuenta aniversario este ano. Foi proposto pola Sociedad Gimnástica.
Todas as propostas presentadas serán analizadas polo xurado do premio o vindeiro luns 13 de xaneiro ás 13.00 horas, nunha reunión que se celebrará na sala de comisións do Concello de Pontevedra.