O Colectivo de persoas xubiladas e pensionistas da CIG realizou na mañá deste xoves unha concentración diante do centro de saúde Virxe Peregrina, en Pontevedra.
Esta mobilización forma parte dunha xornada de protestas coordinadas nas principais cidades galegas co obxectivo de demandar o reforzo do sistema sanitario público e o mantemento dunha atención presencial e sen demoras.
As reivindicacións do colectivo céntranse na necesidade de aumentar os recursos humanos e materiais na rede pública.
Segundo os datos expostos pola organización, a espera para obter unha cita con persoal médico de cabeceira en Atención Primaria supera actualmente os dez ou catorce días.
Para o sindicato, estes prazos resultan determinantes na poboación maior de 60 anos ou con patoloxías crónicas, onde o atraso na atención pode derivar no agravamento de doenzas ou no aumento da dependencia.
O sindicato sinala dificultades tanto na Atención Primaria como na especialidades.
Durante a mobilización, os representantes do colectivo informaron de casos con demoras de ata cinco anos para intervencións como as operacións de cataratas, así como o uso sistemático de derivacións cara á sanidade privada.
Ante esta situación, o colectivo esixe á Xunta de Galicia o cesamento do desvío de fondos públicos cara a centros privados; unha planificación que garanta a equidade no acceso á saúde; e a dotación de persoal suficiente para reducir as listas de espera diagnósticas e cirúrxicas.
Esta acción en Pontevedra sucede ao traballo realizado durante todo este mes de febreiro a través de mesas informativas, onde se recolleron queixas e testemuños directos de usuarios.
A organización sindical avanzou que as protestas terán continuidade nos vindeiros meses para dar visibilidade ás demandas das persoas pensionistas, que defenden que a sanidade pública debe garantir a protección da saúde de forma efectiva: "Non somos números nin unha carga", apuntan.