Coa chegada da tempada alta estival, as praias de Marín xa locen en todo o seu esplendor e, desde este mesmo luns, ondean nelas as bandeiras azuis que logrou o municipio.
A alcaldesa, María Ramallo, acompañada das concelleiras Marián Sanmartín e Cristina Acuña, acudiu a Portocelo para izar este distintivo, que este ano estará en todas as praias a excepción de Loira. A pesar diso esta contará con todos os servizos exactamente igual que as demais.
Un destes é o de socorrismo, que tamén se estrea este luns co despregamento de catorce socorristas repartidos polos distintos areais, segundo as necesidades de cada un; tres auxiliares de información e primeiros auxilios e unha persoa coordinadora.
O seu horario será de luns a domingo, de 12.00 a 20.00 horas, repartidos en quendas, e estarán ata finais de agosto velando pola seguridade dos bañistas.
Este será o primeiro ano en que este servizo sexa xestionado a través da empresa Salvar, Formar y Socorrer SL, que resultou adxudicataria da licitación impulsada polo Concello para os próximos tres anos, con posibilidade dunha anualidade máis de prórroga.
En total, a dotación de socorristas nas praias supón unha inversión de máis de 725.000 euros.