Paso en firme para avanzar no proxecto da coñecida como variante de Alba. A Xunta de Galicia reiniciará "nas próximas semanas" a tramitación administrativa para este viario, que unirá a PO-531 coa N-550 entre os lugares de O Freixo (Campañó) e A Cendona (Lérez).
Así o anunciou a conselleira de Vivenda e Planificación de Infraestruturas, María Martínez Allegue, nunha carta que remitiu ao alcalde de Pontevedra, Miguel Anxo Fernández.
Nesta misiva, resposta á acta de cesión da N-550 entre Pasarón e Alba remitida polo goberno municipal, Martínez Allegue subliña que esta nova variante é "prioritaria" para o executivo autonómico e reclama que haxa "máxima colaboración" por parte do Concello.
A conselleira, que destaca que a Xunta xa dera un "paso importante" ao incluír esta obra nos seus orzamentos para 2025, asegura que os técnicos da Axencia Galega de Infraestruturas xa están a avaliar a forma "máis áxil" de retomar este expediente.
Así, lembra que o proceso para a avaliación ambiental do proxecto non se completou "ante a falta de consenso detectada" na fase de exposición pública, polo que haberá que redactar un novo proxecto de trazado.
Este trámite, segundo detallou María Martínez Allegue, seguirase "sobre a base do proxecto elaborado no seu día pola Xunta" para axilizar os prazos.
A el, engade a titular de Vivenda e Planificación de Infraestruturas, incorporarase a configuración da viaria proposta polo Concello "no máximo posible" e sempre que sexa "compatible" coa funcionalidade da futura variante.
O goberno municipal valorou como "moi positiva" a carta remitida pola conselleira e celebra, subliñou a tenente de alcalde, Eva Vilaverde, que a Xunta coincida en que este vial hai que executalo "canto antes", aceptando o deseño proposto polo Concello.