![](/web/cache/scene/uploads/fotos/foto/a06/_S7QytKoutjK3UsovKMnMzytWsi62MjawUqrKz891Lsov0DGzMN_/_AxNjDQSU7NK0kt0snNTEnJSVWyrgUA_/65b24b6468-20240125-patxot-ana-ponton-empresarios-economia-0204.jpg)
© Mónica Patxot
Pontón debulla en Pontevedra o seu programa económico para que Galicia "aproveite a súa riqueza e potencial"
![](/web/cache/scene/uploads/fotos/foto/072/_S7QytKoutjK3UsovKMnMzytWsi62MjKxUipKLc6sStUxMjDQSU_/_7NK0kt0snNTEnJSVWyrgUA_/65b24b642c-20240125-patxot-ana-ponton-empresarios-economia-0202.jpg)
© Mónica Patxot
Ata Pontevedra acudiu este xoves a candidata do BNG á presidencia da Xunta, Ana Pontón, para debullar, nun almorzo con empresarios, o seu programa económico para gobernar Galicia e lograr que este país "aproveite toda a súa riqueza e o seu potencial".
Para Pontón, a "propaganda de estabilidade e bonanza" que transmite o goberno de Alfonso Rueda "non é a realidade deste país", reclamando un cambio á fronte da Xunta para reverter o declive de Galicia, porque "quen é parte do problema non pode ser parte da solución".
"Estamos a tempo de cambiar o rumbo e introducir as transformacións que nos permitan avanzar e crecer de xeito sostible", defendeu a líder nacionalista, que prometeu buscar "grandes acordos de país" para situar a Galicia "entre as nacións máis avanzadas".
A candidata do BNG prometeu traballar para "xerar confianza" en Galicia, creando un departamento que capte investimento privado no sector industrial, ou para avanzar no autogoberno e "non quedar atrás" con respecto a outras rexións españolas.
Dispoñer de máis recursos financeiros será outra das súas prioridades, entre outras cuestións, convertendo o Igape nun instituto galego de crédito, creando unha oficina especializada na captación e xestión de fondos europeos ou mobilizando o aforro cara a sectores produtivos.
Nesta estratexia, Pontón incluíu unha maior cooperación co tecido empresarial, unha reforma "a fondo" da administración para modernizala ou desenvolver un proxecto "que mire máis para o sur e para o mar", ao entender que o futuro de Galicia "está no Atlántico".
O plan do BNG propón ademais incrementar a colaboración con Portugal, redeseñar o mapa educativo para adaptalo aos cambios no sistema produtivo ou apostar en firme pola transformación tecnolóxica e dixital, que inclúa unha IA "ética e inclusiva".
Tras establecer as súas prioridades, Pontón explicou os "proxectos transformadores" que impulsaría como presidenta, empezando por unha "reindustrialización" de Galicia que peche ciclos produtivos e fortaleza as cadeas de valor, apostando por industrias "innovadoras".
Ademais, avogou por "non perder o tecido empresarial que temos", por crear máis chan empresarial "onde hai actividade" ou por reforzar a base produtiva de Galicia, recuperando terras agrarias e rexenerando as rías para impulsar a actividade da cadea mar-industria.
A líder do BNG propoñerá tamén un "gran pacto galego" que destine o 3% do PIB á ciencia e o I+D+i, sumando a iniciativa pública e privada; un plan para captar e reter talento, similar ao que impulsan Euskadi ou Cataluña, ou a modernización das infraestruturas.
"Por xustiza, igualdade e equidade" a primeira petición que fará a Pedro Sánchez será a transferencia da AP-9, ao que sumou o impulso ao AVE entre Vigo e Lisboa, reforzar a mobilidade ferroviaria ou unha mellor coordinación entre os tres aeroportos galegos.
E con respecto ao modelo enerxético, que actualmente ven "feito a medida" das grandes compañías, o BNG promete implantar unha tarifa eléctrica galega e a creación dunha empresa pública de enerxía, para que Galicia teña "máis capacidade de decisión" sobre este sector.
LORES: "PONTÓN ME REPRESENTA COMO NUNCA ME REPRESENTOU NINGUÉN A NIVEL GALEGO"
Neste almorzo, no que a líder do BNG presentou as principais medidas do seu programa en materia económica, interveu tamén o candidato por Pontevedra, Luis Bará, que sostivo que os nacionalistas están "preparados para gobernar".
Estano, asegurou, tras facer un "esforzo por resetearse e por achegarse á realidade económica do país", un proceso de escoita e diálogo que lles axudou a "coñecer mellor o país e romper certos prexuízos e desconfianzas que podían ser recíprocas".
"O país e o seu empresariado están preparados para un goberno do BNG e interésalles un goberno que teña a cabeza e o corazón na defensa de Galicia", subliñou Bará.
O alcalde de Pontevedra, Miguel Anxo Fernández Lores, asegurou que as eleccións do 18F son unha "oportunidade" para que goberne un partido que "ten confianza neste país, na súa xente e nas súas inmensas potencialidades", liderado por Ana Pontón.
Da propia Pontón, Fernández Lores destacou que "me representa como nunca me representou ninguén a nivel galego" e mostrouse convencido de que será unha presidenta que "vai dar todo de si para que Galicia teña un futuro certo".
Ana Pontón presenta ante empresarios de Pontevedra as súas propostas económicas de goberno
Ata Pontevedra acudiu este xoves a candidata do BNG á presidencia da Xunta, Ana Pontón, para debullar, nun almorzo con empresarios, o seu programa económico para gobernar Galicia e lograr que este país "aproveite toda a súa riqueza e o seu potencial"
© Mónica Patxot