O deporte urbano e o ocio xuvenil, entre as "prioridades" de Marín para as vindeiras semanas
Por Redacción
A alcaldesa de Marín, María Ramallo, fixo esta fin de semana un balance dos proxectos que veñen de adxudicarse e doutros que están a piques de poder estalo, para así iniciar os traballos e anunciou que nas vindeiras semanas iniciarase a execución de varios proxectos esenciais en distintos ámbitos.
Ramallo sinalou que o deporte urbano e o ocio xuvenil teñen que estar entre as súas "prioridades" e, neste campo, xa se adxudicou o proxecto de mellora e remodelación do skatepark do Parque Azul á empresa Zona de Obra O Rosal SLU, por un importe de 41.512,10 euros máis IVE.
Do Parque Azul destaca o Concello que neste proxecto xúntanse factores moi interesantes: unha contorna boa con saída ao mar, canchas de baloncesto, unha praza na que poder pasear, o parque infantil... "Seguiremos tratando de poñer en valor esta zona", asegurou a rexedora.
Tamén teñen en carteira proxectos para a preservación e o coidado do patrimonio e "pronto" comezarán os traballos na Torre do Reloxo.
Ese proxecto, adxudicado a Construcciones Perfecto Villanueva por algo máis de 34.700 euros (máis IVE), ten por obxecto realizar labores especializadas de conservación e restauración, despois de que xa se actuara noutras zonas do Templo Vello, que é "sen dúbida, un icono esencial do noso pasado e do noso patrimonio eclesiástico".
Tamén están a piques de ser adxudicadas as obras do proxecto de renovación do pavimento do entorno do CEIP Carballal, que ten un orzamento base de case 48.420 euros e que conta cunha subvención do 60% por parte do Plan Concellos 2022-2023 da Deputación de Pontevedra.
Este proxecto supón a creación de itinerarios seguros de acceso ao centro. Con este proxecto, ordenarán esa zona para que poida haber un tránsito peonil máis seguro e para que os vehículos teñan un firme en condicións. O seguinte paso a dar será abrir as ofertas presentadas e que a Mesa de Contratación adxudique finalmente a obra.
CRÍTICAS DO PSOE
O PSOE de Marín amosouse esta fin de semana crítico co Goberno local por esconder un "fraude de lei" tras a concesión da piscina de auga salda.
O portavoz socialista, Manuel Pazos, sinalou que María Ramallo solicitou unha concesión á Autoridade Portuaria para que a dársena de embarcacións sexa cedida ao concello para un "uso náutico-deportivo" coa "única intención de que lla aproben, sen mencionar no expediente que o fin real é outro ben distinto, unha zona de baño".
"Querémoslle lembrar que o uso náutico deportivo é para a prestación de servizos ás embarcacións deportivas e de lecer e que está prohibido o baño nesas zonas", sinalou Manuel Pazos.