O Paseo de Silgar e a Rúa Madrid terán plataforma única e prioridade peonil
![Redacción](/web/cache/scene/uploads/xornalistas/foto/_S7QytKoutjK3UsovKMnMzytWsi62MjSxUqrKz891Lsov0DEyAC_/_Il61oA_/506490f5a15ce-c6ku5opwb5qbtijalxd0_reasonably_small.jpeg)
Por Redacción
Afianzar o carácter peonil do eixo que forman o Paseo de Silgar, a Rúa Madrid e a Avenida do Porto. Con ese obxectivo, o goberno municipal de Sanxenxo converterá todo este ámbito nunha zona con plataforma única que terá como prioridade os desprazamentos a pé.
O ámbito de actuación será desde o cruzamento da Rúa Ourense ata a intersección coa Rúa Cesteiros. Alí habilitarase unha plataforma única en lastra que terá unha superficie de 4.783 metros cadrados. A obra, que custará 630.000 euros, estará terminada en xuño.
O Concello explica que a área de acceso rodado executarase cun cambio de pavimento, con lastra coloreada, para unha mellor visibilidade para o condutor e o peón, dando así maior seguridade á intervención.
No encontro entre este e as beirarrúas colocarase unha rigola acanalada para favorecer a recollida de augas pluviais e facilitar a súa rápida evacuación.
Ademais, no cruzamento coa rúa Luis Vidal Rocha crearase unha zona de esparexemento, con mobiliario urbano que convide o descanso dos viandantes.
O proxecto incluirá a renovación da rede de saneamento e unha nova iluminación pública, cambiando farois e luminarias por outras máis eficientes.
Así, os farois tipo fernandinos existentes no tramo de Rúa de Madrid ata a intersección coa Rúa Cesteiros serán substituídos por outras de tecnoloxía LED e deseño contemporáneo e cambiarán de marxe dous farois existentes fronte ao Pazo Patiño.
Desde a rotonda do porto de Sanxenxo ata a rotonda de Silgar prevese a reconversión dos equipos actuais de vapor de sodio por outros con tecnoloxía LED, mantendo a carcasa do farol actual e actuando unicamente sobre o equipo.
Na zona situada fronte á Rúa Luis Vidal Rocha exponse ademais a instalación de novos puntos de luz tipo baliza.
Relacionadas:
-
A plataforma única de Silgar estará rematada este venres cun total de 144.000 lastras azuis
Por Oskar Viéitez |
-
Trece días de obras para converter o Paseo de Silgar en plataforma única
Por Redacción |
-
Queixas polo deterioro da principal vía de acceso ao Porto Deportivo de Sanxenxo
Por Oskar Viéitez |