O Foro da Familia ve "dobre moral" do PSOE na pancarta do aborto e "usurpación de edificios públicos"
Por Redacción
A pancarta 'Polo dereito das mulleres a decidir: aborto libre e gratuito' colgada en xaneiro no balcón da Casa Consistorial da Praza de España segue xerando polémica un mes e medio despois. Este sábado volveu traela a conto o Foro Galego da Familia, que xa no seu día esixira ao Concello de Pontevedra a súa retirada, e agora denuncia que a súa instalación é "unha usurpación dos edificios públicos".
O Foro Galego da Familia volveu referirse á pancarta para criticar, neste caso, ao grupo municipal do PSdeG-PSOE, que forma parte do Goberno bipartito. "Non é aceptable a dobre moral que supón dicir unha cousa en Madrid e outra en Galicia", di a través dun comunicado de prensa no que se refire a todos os concellos galegos nos que se instalaron este tipo de pancartas e cita, en particular, ao de Pontevedra.
En concreto, o Foro Galego da Familia refírese á proposición non de lei presentada polos socialistas no Congreso dos Deputados na que se se sostén "...que os símbolos e monumentos públicos han de ser ocasión de encontro e non de enfrontamento, ofensa ou agravio". Ao seu entender, esta actitude supón unha "contradición" coa colocación de pancartas a favor do aborto.
"Os cidadáns non podemos asistir impertérritos ante a dobre moral que demostran algúns partidos como o PSOE coa súa actitude contraditoria, segundo se manifesten en Galicia ou en Madrid, á hora de defender nun sitio e rexeitar noutro o uso das institucións públicas cun criterio tan arbitrario como é a propia ideoloxía", recolle o comunicado.
En opinión do Foro Galego da Familia, "a usurpación e instrumentalización dos edificios públicos por parte dalgunhas corporacións municipais para adoutrinar nunha ideoloxía particular, é un claro síntoma de totalitarismo antidemocrático, que polo tanto rexeitamos,".
O seu presidente, Luis Martín Pereira, diríxese aos partidos políticos en xeral para indicarlles que "os cidadáns galegos merecemos o respecto de todas as institucións e partidos políticos" e engadir que "a demagoxia sempre é inadmisible, pero máis cando falamos do dereito á vida".
"Os cidadáns galegos sentímonos ofendidos e agraviados, e cremos, que a colocación desas pancartas nos edificios públicos dos nosos concellos non contribúen precisamente á paz social", conclúe.
Relacionadas:
-
O PP exixe "respecto institucional" ao alcalde: "Non queremos que usurpen as instalacións de todos"
Por Redacción |
-
O balcón do Concello seguirá expresando a súa opinión
Por Oskar Viéitez |
-
O Foro Galego da Familia esixe ao goberno de Pontevedra que retire inmediatamente a pancarta sobre o aborto
Por Redacción |
-
Animan os pontevedreses a dar "un golpe potente na mesa" contra a "retrógrada" lei do aborto
Por Redacción |