45 vítimas de violencia de xénero recibiron protección da Policía Local en 2013
Por Natalia Puga
O grupo da Policía Local de Pontevedra dedicado en exclusiva á protección das vítimas de violencia de xénero controlou durante o último ano un total de 45 mulleres que denunciaran ser vítimas deste delito ou de violencia doméstica. A estes datos hai que sumar os realizados por outras Forzas de Seguridade como, no caso da cidade, a Policía Nacional.
Entre outras tarefas, os axentes municipais adscritos ao equipo con dedicación exclusiva na materia manteñen contactos coas vítimas. Dos 403 contactos realizados o ano pasado, 333 foron telefónicos e 70 a través de entrevistas persoais.
Ademais, neste ámbito delictuoso, en 2013 a Policía Local trasladou dúas vítimas á Comisaría da Policía Nacional para que presentasen denuncia e acompañou a cinco para poder realizar diversas xestións. Dez mulleres tiveron un dispostivo especial de vixilancia no seu domicilio, cinco delas para poder localizar á vítima, dúas para poder protexela y dúas para detectar se había convivencia entre a presunta agredida e o seu suposto agresor.
Segundo consta na memoria de actividade policial, das vítimas protexidas, 34 foron vítimas de violencia de xénero, seis de violencia doméstica e as cinco restantes doutros delitos relacionados.
Os datos son moi semellantes neste ámbito aos rexistrados no ano anterior. En 2012 as vítimas controladas foran 46, 33 por violencia de xénero e oito por doméstica. Nese caso, a maioría foran calificadas como de risco medio (18) e había oito de risco baixo e dez nas que non se apreciou ningún risco.
Os axentes municipais interveñen tanto na protección das vítimas como no momento no que se ten constancia do delito. Durante o ano 2013 realizaron neste senso 18 intervencións, máis do dobre das oito nas que interviran no ano anterior. Deses 18 atestados nos que se viron implicados, 15 remataron cunha persoa detida e tres cun home imputado.
Esas 18 intervencións vinculadas coa violencia sobre a muller do ano pasado foron, na súa maior parte, por violencia de xénero, que derivou en 16 casos, 13 por malos tratos, dous por ameazas e un por quebrantamento da orde de afastamento dun agresor previo. Ademais, houbo dous casos de violencia doméstica, un por ameazas e outro por malos tratos.
No ano anterior, das oito intervencións seis remataron en detención e dúas en imputación e seis foran por un delito de violencia de xénero novo, mentres que dúas por ter quebrantado un presunto agresor a orde de afastamento que tiña ditada para protexer a vítima.