Sombra aquí e sombra alá
Por Oskar Viéitez
O estudantado de terceiro curso da escola de Deseño e Moda acudiu a un workshop de fotografía de moda, no que Guy Pranzili e Silvia Fervenza, perruqueiro e estilista que traballan para marcas como Bimba y Lola ou Carolina Herrera, deron unhas guías para enfrontar a maquillaxe en fotografía e vídeos de moda.
Ao longo da mañá, os futuros profesionais do sector aprenderon como corrixir olleiras, bolsas, imperfeccións na cute ou como sacar o máximo partido aos ollos e á cor de pel da modelo ou do modelo.
"Aínda que non sexamos profesionais da maquillaxe, si que nos vén moi ben ter idea de que técnicas e trucos melloran a presentación dos estilismos", explica a alumna Raquel Álvarez que se mostrou moi interesada na táboa que indicaba que gamas cromáticas "favorecen máis" segundo a tonalidade da pel.
Tras o obradoiro práctico de maquillaxe foi a quenda de Mariana Maglio, especializada na pos-produción dixital, que achegou diversas técnicas para o tratamento e retoque de imaxes.