Despois de oito anos 27.000 estafados pontevedreses de Fórum e Afinsa seguen a reclamar unha solución
Por Oskar Viéitez
Un centenar de afectados pola estafa de Fórum Filatélico e Afinsa concentráronse este xoves ante a sede da Subdelegación do Goberno de Pontevedra convocados por Adicae e a federación de clientes destas entidades para reclamar "unha solución política e Xustiza".
Estes afectados recordaron que o pasado 19 de novembro o Congreso dos Deputados aprobou unha Proposición Non de Lei instando o Goberno a avaliar a situación e a posible adquisición aos afectados das súas débedas, dado o alcance da fraude e a ausencia de solución tras máis de 8 anos dende o estalido deste.
Esta plataforma unitaria "Solución Fórum, Afinsa e Arte e Natureza" propón a creación dunha mesa de negociación e diálogo composta polos grupos parlamentarios, o Goberno e representantes de afectados.
A coordinadora de Adicae en Galicia, Iria Aguete, informou que na provincia de Pontevedra son máis de 27.000 os afectados e o que plantexan é que o paso logrado ata agora (a unanimidade de todos os partidos no Congreso e en 16 parlamentos autonómicos) "se traduza nunha solución efectiva".
Segundo explicou esta voceira, a proposta de solución consiste en que o Estado lanzaría aos afectados unha oferta de compra (a través do ICO) dos dereitos que teñen recoñecidos no proceso concursal (o diñeiro que depositaron no seu momento nas empresas). O Goberno fixaría de acordo cos afectados o valor (porcentaxe de recuperación) desta compra. A aceptación desta proposta sería voluntaria para cada afectado.
Os afectados recibirían o diñeiro desta venda dos seus dereitos en varios exercicios. A aceptación desta solución non interferiría co resto de procedementos xudiciais en marcha.