O sol vaise de vacacións
Por Redacción
A predicción dos técnicos de MeteoGalicia para o inicio da semana é un "máis do mesmo".
Este luns, Galicia estará nun área atmosférica moi "indefinida" na que o máis salientable será a dirección dos ventos que soprarán do oeste e continuarán achegando humidade. Deste xeito o ceo estará parcialmente anubrado, con máis nubes canto máis ao oeste durante a mañá que deixarán algunha chuvia de carácter feble e ocasional; sen embargo pola tarde agardamos máis nubes no leste, de evolución, que deixarán algúns chuvascos treboentos.
As temperaturas, tanto máximas coma mínimas ascenderán lixeiramente. O vento soprará frouxo de compoñente oeste.
Non se agardan cambios moi significativos do tempo para o martes, polo que Galicia continuará nun área intermedia entre altas e baixas presións.
Para o mércores as altas presións tenderán a entrar en Galicia en forma de cuña, pero os ventos do noroeste introducirán aire algo máis frío en superficie. Deste xeito teremos ceos parcialmente anubrados no litoral, máis abertos no interior, aínda que con néboas matinais.
As temperaturas experimentarán un descenso durante esta xornada, entre lixeiro e moderado. Os ventos soprarán frouxos, variables pola mañá, do noroeste pola tarde.