A presidenta da Deputación visita a Escola Naval de Marín
Por Redacción
A presidenta da Deputación Provincial de Pontevedra, Carmela Silva, acompañada do deputado de Turismo, Santos Héctor, visitou este luns a Escola Naval Militar de Marín (ENM). Á súa chegada foron recibidos polo Comandante Director, capitán de navío José María Núñez e o director do Centro Universitario da Defensa, José María Pousada Carballo.
Tras a firma no libro de honra, a presidenta da Deputación aproveitou para coñecer as diversas instalacións onde se forman e conviven os futuros oficiais, entre elas, as lanchas de instrución, o pañol histórico, a biblioteca central e académica, o simulador de navegación, a enfermería, a residencia "García Romeral", o planetario e o Centro Universitario da Defensa.
Durante a visita á escola, puideron coñecer de primeira man o funcionamento diario do centro militar, así como o nivel de implementación do novo modelo de ensino, atendendo aos plans de estudos que actualmente se imparten aos futuros oficiais da Armada e que, no caso da Escola Naval, inclúen a obtención dun título de grao de Enxeñería Industrial, rama mecánica.
Por último, Carmela Silva xunto co deputado provincial, Santos Héctor, xantou no comedor cos alumnos da escola.