Condenan a dous anos de prisión a un mozo por trapichear nas inmediacións da discoteca Zoo de Sanxenxo
Por Oskar Viéitez & Mónica Patxot
A Sección Segunda da Audiencia Provincial de Pontevedra resolveu este martes cun acordo de conformidade o xuízo contra un mozo acusado de trapichear con sustancias estupefacientes nas inmediacións da discoteca Zoo de Sanxenxo.
Foi nun operativo da Garda Civil cando este mozo, Sergio R.P., con domicilio en Arteixo (A Coruña), foi sorprendido con diversas cantidades de droga para a súa venda polo miúdo.
En concreto, os feitos sucederon sobre as 01.00 horas do día 6 de abril de 2012, e o acusado portaba un conxunto de bolsitas que contiñan diversas sustancias estupefacientes e psicotrópicas no seu interior.
Incautóuselle unha bolsita con 4,059 gramos de marihuana, taxada en 18,955 euros; outra bolsita con 2,998 gramos de marihuana, taxada en 14 euros; unha bolsita con cristais grises de MDMA (Metilendioxime) cun peso de 1,105 gramos, cunha pureza do 77,36 % e taxada en 5,757 euros; seis bolsitas de cristais grises de MDMA (Metilendioxime) cun peso de 2,576 gramos, unha pureza do 79,73 % e taxada en 13,420 euros; unha bolsita con 0,248 gramos de cocaína, cunha pureza do 68,65 % e taxada en 23,737 euros; dez bolsitas con 3,71 gramos de cocaína, cunha pureza do 36,20 % e taxada en 186,907 euros; e unha bolsita de fármaco anfetamínico sulfato cun peso de 1,168 gramos, unha pureza do 4,01 % e taxada en 6,085 euros.
Este martes ante os maxistrados pontevedreses o procesado admitiu a súa autoría, sendo condenado por un delito contra a saúde pública por tráfico ilícito de drogas, neste caso, na modalidade de drogas que causan grave dano á saúde.
Aínda que inicialmente o fiscal pedía que se lle impuxese unha pena de catro anos e tres meses de prisión, e multa de 806,77 euros, finalmente a condena rebaixouse a 2 anos e unha multa de 268 euros.
O fiscal, David de la Fuente, non se opón á suspensión da entrada en prisión, a condición de que o acusado participe nun programa de rehabilitación de consumo de sustancias tóxicas.