Chegan os "Campamentos Polideportivos Príncipe Felipe"
Por Redacción
Xa é posible inscribirse nos "Campamentos Polideportivos Príncipe Felipe", que oferta a Deputación de Pontevedra para o verán de 2016 nas instalacións deste centro educativo. Os participantes poderán ser estudantes nados entre os anos 2002 e 2009 que residen nos concellos da provincia de Pontevedra.
En total, a Deputación pon a disposición dos concellos 300 prazas distribuídas en seis quendas entre o 11 de xullo e o 27 de agosto. De entre todas elas, 30 prazas, repartidas nas diferentes quendas, estarán destinadas a escolares do Centro Príncipe Felipe.
As prazas serán distribuídas en función do número de habitantes dos concellos e a asignación das prazas realizarase mediante sorteo público.
Os acampados aloxaranse en albergue en réxime de pensión completa e estarán atendidos por un equipo técnico formado por persoal especializado. Amais, a institución provincial aportará todo o material necesario para o desenvolvemento das actividades.
O prezo será de 125 euros por praza. Os interesados poden presentar as solicitudes, ben mediante formulario web ou formulario impreso (que se poderá recoller na oficina de información ó cidadán da Deputación de Pontevedra e na súa sede en Vigo), ata o 15 de abril de 2016.
Con esta iniciativa, a Deputación de Pontevedra ofrece a posibilidade de participar en actividades lúdicas, educativas e deportivas que contribúan ao desenvolvemento persoal e o coñecemento doutros lugares fóra da contorna dos mozos e mozas.