A Policía Local atendeu unha media de 80 chamadas ao día durante 2015
Por Alejandro Espiño
Un total de 29.219 chamadas recibiu a central da Policía Local de Pontevedra durante o pasado 2015. Así se recolle na memoria do servizo. De todas elas, 4.054 (un 16% do total) son relativas ao tráfico na cidade, ben por accidentes ou ben para denunciar que se cometeu algunha infracción administrativa.
É unha das principais razóns polas que os pontevedreses contactan coa Policía Local. En todo caso, dúas de cada tres chamadas (18.999) son para xestións de tipo interno, un epígrafe no que se inclúen, entre outros, obxectos perdidos, solicitudes de información xeral ou consultas relativas á circulación ou a ocupación temporal de vía pública.
Un 8% destas chamadas (2.292) son por cuestións relativas á seguridade como pelexas, altercados, episodios de violencia de xénero, consumo de drogas, requirimentos relacionados con locais de lecer, roubos ou furtos ou os denominados servizos humanitarios, onde se inclúen as axudas a domicilio, caídas na vía pública, intoxicacións etílicas, rescates ou traslados a centros psiquiátricos.
Os servizos de emerxencia provocaron 484 chamadas (só un 2% do total) para atender alertas por incendios ou fugas de gas, requirimentos relacionados con inmobles ou intervencións por temporais e outros adversos meteorolóxicos; mentres que por deficiencias na vía pública, problemas con animais e outras peticións varias recibíronse en 2015 3.390 chamadas, un 11% de todas as realizadas.
Ademais, como curiosidade, a Policía Local destaca que estas chamadas dispáranse no mes de xullo, alcanzando as 2.815.
É a quenda de mañá o que acumula case a metade das mesmas, 14.200, mentres que só o 12% (3.563) son durante a noite. De todas elas, 17.465 (un 60% do total) son realizadas desde un teléfono móbil e un 7% (2.069) son doutros servizos de emerxencia como 112 Galicia, Bombeiros, Protección Civil, Policía Nacional, Garda Civil ou o 061.
Relacionadas:
-
A Policía Local resolveu o pasado ano 55 conflitos entre pontevedreses mediante a mediación
Por Alejandro Espiño |
-
Os atropelos na cidade, baixo mínimos: houbo 34 en 2015 e ningún con falecidos
Por Alejandro Espiño |
-
Barcelos é o lugar de Pontevedra onde se multa a máis vehículos por mal estacionamento
Por Redacción |