En pé de Paz
Por Oskar Viéitez & Mónica Patxot
"A nosa loita é por un mundo en paz, por iso hoxe estamos aquí para dicir xuntos que non nos imos a render, que estamos en pe de paz", con estas palabras explicou a presidenta da Deputación, Carmela Silva, o sentido da concentración que uniu ás corporacións provincial e municipal para condenar o brutal atentado perpetrado na pasada madrugada na localidade francesa de Niza.
Deputados, edís, asesores e funcionarios celebraron cinco minutos de silencio para honrar ás vítimas do atentado, no que un camión arroiou a decenas de persoas que celebraban o 14 de xullo.
"Queremos manifestar de maneira contundente o rexeitamento contra calquera tipo de violencia", dixo o alcalde, Miguel Anxo Fernández Lores. "Non hai nada que xustifique a morte de persoas", subliñou.
Carmela Silva e Fernández Lores coincidiron en que o seu rexeitamento ao terrorismo "é igual tanto en Niza ou na Unión Europea como no resto dos países do mundo" facendo un "chamamento ao sentido común, ao fin da violencia".
A presidenta provincial destacou que "os demócratas temos que seguir loitando por un espazo de convivencia onde o diálogo, o acordo e o debate sexa o espazo para tratar as diverxencias".