Dous detidos e dous investigados por unha trama dedicada á vertedura ilegal de residuos perigosos
Por Redacción
A Garda Civil detivo dúas persoas e investiga outras dúas como presuntas integrantes dunha trama que se dedicaba ao almacenamento, transporte e depósito ilegal de materiais de construción e demolición mesturados, na súa maior parte, con residuos perigosos. A rede deuse por desarticulada.
Segundo informou a Garda Civil, os dous detidos como presuntos principais xefes da trama son os responsables dunha empresa de Sanxenxo dedicada ilegalmente á xestión e almacenamento temporal de residuos tóxicos. Os dous investigados son o propietario dunha das empresas que efectuaba o transporte dos residuos e o dono da máquina retroescavadora que empregaban para as mesmas fins. Este último era tamén o propietario da leira onde se localizou unha das verteduras incontroladas.
A investigación do Servizo de Protección da Nauturaleza (Seprona) da Garda Civil de Vilagarcía iniciouse por mor da localización dunha parcela cunha importante cantidade de residuos de construción e demolición na parroquia de Baión, en Vilanova de Arousa.
As pescudas realizadas para coñecer a orixe desta vertedura enseguida conduciron aos investigadores ata o municipio de Sanxenxo, onde se sitúa a empresa que estaba a realizar a xestión destes residuos.
En Sanxenxo, os axentes do Seprona comprobaron que esta empresa carecía da preceptiva autorización administrativa para este tipo de actividade e, ademais, era responsable doutros seis depósitos de verteduras que foron localizados en distintos puntos da comarca do Salnés, un deles nunha parcela anexa ás instalacións da mesma empresa.
Como dato significativo que documenta o perigo potencial destes depósitos e almacenamentos de residuos perigosos, a Garda Civil indica que algún deles atópase a poucos metros da canle dun regato que discorre próximo á zona.
O Seprona realizou unha inspección en todos estes puntos ilegais de almacenamento de materiais de construción e demolición e atopou mesturados e semienterrados unha importante cantidade de residuos cualificados como perigosos, tales como placas de fibrocemento (uralitas, tubaxes e canlóns que conteñen amianto), pinturas industriais, aceites minerais e filtros de automoción.
Tanto as dúas persoas detidas como os dous investigados enfróntanse a un suposto delito contra os recursos naturais e o medio ambiente penalizado no Código Penal con penas de prisión de ata dous anos.