O anticiclón regresa ás Rías Baixas para quedarse ata mediados da vindeira semana
Por Redacción
Este sábado 20 comeza a recuperarse a situación anticiclónica pero permanecerán os ventos de compoñente oeste e con presenza do aire frío derivado da última fronte. Ao longo do día iranse abrindo grandes claros. As temperaturas máximas situaranse ao redor dos 25 graos. O vento soprará frouxo de dirección variable virando cara a dirección noroeste.
Durante o domingo 21, o centro do anticiclón sitúase moi preto de Galicia, achegando aire seco e cálido, segundo as previsións de Meteogalicia. Desta forma predominará o ceo moi despexado con temperaturas que superarán os 30 graos na zona das Rías Baixas. Os ventos soprarán frouxos de compoñente norte en xeral.
O luns manterase a influencia das altas presións, con entrada de aire cálido desde o sur peninsular. Espéranse ceos despexados con temperaturas que continuarán situándose ao redor dos 30 graos. Os ventos soprarán frouxos de dirección variable.
Continuarán as temperaturas calorosas durante o martes 23. Con todo, o mércores 24 entrará aire frío nas capas medias e altas da atmosfera. Desta forma irase inestabilizando a situación e aparecerán nubes cun incremento da probabilidade de choiva, ademais de rexistrarse un descenso de temperaturas.