Denuncian ante a Valedora do Pobo a opacidade do convenio da praza de touros
Por Oskar Viéitez
Máis de 210 días esperando pola resposta a dúas preguntas sobre o uso que o Concello de Pontevedra dá ao convenio de aluguer da praza de touros que subscribiu nos anos 2014 e 2015. Esta é a denuncia que a plataforma "Galicia, mellor sen touradas" acaba de remitir á Valedora do Pobo, criticando a 'indefensión' que se produce nunha solicitude de información.
Os abolicionistas, que rexistraron a petición o pasado mes de abril, non volveron a ter noticias das preguntas realizadas como cidadanía no marco da Lei de Transparencia e Bo Goberno de 2013, que faculta a calquera persoa, xa sexa física ou xurídica, a demandar os datos que estime oportunos sen ter que xustificar a súa motivación ou uso posterior. No caso da plataforma, é coñecido o interese por facer pública a realidade dun arrendamento que estiman "gravoso" para o conxunto dos pontevedreses.
Segundo as contas que fai esta plataforma, se desde hai 16 anos o goberno local subscribe acordos de aluguer co coso de San Roque, calcúlase que estes convenios supuxeron xa o desembolso de máis 740.000 euros, o que para "Galicia, mellor sen touradas" supón un "subsidio indirecto" á organización das sucesivas feiras taurinas.
Os activistas contrarios ás corridas de touros instan o goberno local a ter un maior grao de transparencia e a defender o seu propio convenio ofrecendo toda a información ao conxunto da sociedade.
Como alternativa "Galicia, mellor sen touradas" expón o uso doutros espazos públicos, como o Estadio Municipal de Pasarón, "con maior capacidade e posibilidades para grandes actos como a Feira Franca ou o aproveitamento das diferentes prazas deste municipio peonalizado para descentralizar as actividades de lecer".
Relacionadas:
-
Propoñen un referendo sobre o convenio taurino que sexa vinculante para o próximo goberno local
Por Oskar Viéitez |
-
De que nos queixamos os pontevedreses á Valedora do Pobo?
Por Oskar Viéitez |
-
Animalistas piden ao Concello que os Reis Magos cheguen a Pontevedra sen camelos nin cabalos
Por Oskar Viéitez |
-
Foches un dos 12.000 da praza de touros? Búscate
Por Cristina Saiz |
-
A praza de Touros, abarrotada de público para seguir os Torneos Medievais
Por Diego Torrado |
-
Piden suprimir o torneo medieval na próxima Feira Franca
Por Oskar Viéitez |