O ERE apraza as eleccións sindicais en ENCE ata 2014 coa oposición do CSIF
Por Redacción
Este martes 30 de abril tiñan que constituírse as mesas electorais para iniciar o proceso de selección dos representantes sindicais de ENCE na fábrica de Pontevedra. Non obstante, a maioría dos sindicatos e dos membros do comité decidiu aprazar o pistoletazo de saída para o período electoral.
As causas que se esgrimen por parte da maioría dos sindicatos é que o equipo se encontra nun momento de conflitividade laboral coa negociación de ERE. Así o manifesta o presidente do comité de empresa, Xesús Graña, que indica que "dende hai tempo as centrais sindicais, CCOO, UGT e CIG consideramos que pola problemática do ERE, unha situación que nunca se dera, e polo proceso de negociación do convenio marco era convinte aprazalas. A Mesa electoral entendeu a nosa postura e seguiu o que establece a lei". Ante esta situación, o actual comité mantería o seu mandato ata o primeiro trimestre de 2014.
O CSIF é o sindicato que presentou o preaviso e a súa total oposición a este aprazamento electoral. Dende esta central consideran que o ERE non pode ser unha escusa porque "está parado temporalmente". Nun comunicado, o CSIF sinala que "si esto nos lo hace el gobierno, arde la calle, pero en ENCE se manipula, con no se sabe bien qué intereses, para mantenerse y evitar que las urnas decidan". Neste comunicado acúsase de "falta de democracia" a un comité de empresa que ten o seu mandato vencido.
Xesús Graña disente. O presidente do comité cre que se algunha irregularidade "actuará a autoridade laboral". E engade que non teñen ningún interese en perpetuarse no cargo. E non é só unha decisión da CIG que ten a maioría senón que apoian tamén CC.OO. e UGT". Ademais, debido á diminución de persoal na fábrica, o comité veríase reducido dos 13 representantes actuais a tan só 9. Graña engadiu que ademais os representantes do CSIF non teñen representación legal "porque se presentaron como independentes e despois convertéronse en CSIF".