A Policía Local monta un operativo de tráfico pola proba ciclista Rogelio Acuña
Por Redacción
Con motivo da proba ciclista II Gran Premio Rogelio Acuña a Policía Local de Pontevedra deseñou un operativo de tráfico que afecta á circulación de vehículos no centro histórico e nos arredores.
As restricións comezarán ás 15.00 horas e finalizarán entre as 20.00 e as 20.45 horas.
A saída da proba será na Praza de España e discorrerá polas rúas Arcebispo Malvar, Galera, avenidas de Uruguai e Bos Aires, Pai Amoedo, Cobián Roffignac, Benito Corbal, Praza da Peregrina e rúa Michelena, con final na praza de España.
Os corredores darán varias voltas a este circuíto.
Haberá restricións de estacionamento, prohibíndose aparcar a partir das 13.30 horas en Avenida Uruguai, Pai Amoedo, Cobián Roffignac e Xeneral Martitegui e a partir das 15.00 horas na Avenida Bos Aires, para facilitar os labores propios do mercado.
En canto aos cortes de rúas, todo o percorrido da proba permanecerá pechado ao tráfico desde as 15.00 horas ata o termo da competición, aproximadamente as 20.45 horas.
Durante a celebración do Gran Premio Rogelio Acuña non se permitirá o tráfico de entrada en todo o centro histórico, aínda que se habilitarán dous puntos de saída: Arcebispo Malvar cara á Alameda ou Xeneral Martitegui e Sarmiento en dirección Santa Clara (esta última inviste a súa dirección).
Tanto a Avenida de Uruguai e Bos Aires, entre as pontes das Correntes e o de Santiago, permanecerá pechado ao tráfico o sentido de circulación cara á ponte dos Tirantes (paso alternativo pola ponte dos Tirantes, Alexandre Bóveda, Avenida de Compostela, Xoán Manuel Pintos e Domingo Fontán cara á ponte das Correntes).