![](/web/cache/scene/uploads/fotos/foto/b49/_S7QytKoutjK3UsovKMnMzytWsi62MjawUqrKz891Lsov0DGzMN_/_AxNjDQSU7NK0kt0snNTEnJSVWyrgUA_/5af33b7488-dsc_1089.jpg)
© Concello de Ponte Caldelas
Ponte Caldelas mantén o rexistro da propiedade
![Redacción](/web/cache/scene/uploads/xornalistas/foto/_S7QytKoutjK3UsovKMnMzytWsi62MjSxUqrKz891Lsov0DEyAC_/_Il61oA_/506490f5a15ce-c6ku5opwb5qbtijalxd0_reasonably_small.jpeg)
Por Redacción
O Concello de Ponte Caldelas seguirá tendo oficina de Rexistro da Propiedade, ameazada ata agora polo decreto estatal de fusións.
O peche descártase tras unha xestión do goberno local que impulsou un acordo para alugar a prezo reducido o inmoble da antiga sede de Turismo, converténdoa así na oficina na que toda a veciñanza da comarca realizará os trámites oficiais relacionados coa propiedade inmobiliaria.
A iniciativa púxose en marcha o pasado ano e tivo que comezar coa regularización da situación administrativa do inmoble, debido a que seguía inventariado como matadoiro municipal, a pesar de que hai décadas que deixou de ter este uso, e escenificouse coa firma do contrato de aluguer entre o alcalde e a rexistradora da propiedade de Redondela e Ponte Caldelas, Cristina Rollán.
Esta oficina abrirá ao público previsiblemente en setembro, permitindo manter en nómina ás tres empregadas actuais.
A atención ao público prestarase en horario de 9:00 a 17:00 horas de luns a venres.
O Rexistro da Propiedade realiza todos os trámites de inscrición de documentos inmobiliarios, ademais da expedición das notas simples e as certificacións. Funciona, ademais, como oficina caixa de correos da Axencia Tributaria Galega.