O bo tempo propicia a chegada dos primeiros incendios forestais
Por Redacción
Co bo tempo chegaron os primeiros incendios á comarca. Aínda que por agora, por sorte, de consecuencias non demasiado importantes.
Medios do servizo de extinción de incendios da Xunta de Galicia, axudados por efectivos de Protección Civil de Caldas de Reis, desprazáronse na tarde do xoves ao lugar de Arcos da Condesa para sufocar un lume que se declarou na zona.
Foi ao redor das cinco da tarde. O incendio, que foi extinguido en menos de dúas horas, acabou afectando a unha superficie de 1.400 metros cadrados de arboledo.
Desde as autoridades lembran que, co aumento das temperaturas, débense extremar as precaucións se se efectúa unha queima e, antes do próximo 31 de maio, os propietarios dos terreos deben telos rozados e en perfecto estado de limpeza.
En caso de divisar un incendio, débese chamar inmediatamente ao teléfono 085.