Sanidade aprecia unha transmisión "importante" da COVID-19 por reunións entre amigos e familiares
Por Alejandro Espiño
379 casos activos e unha incidencia "en ascenso" desde o pasado 22 de agosto -aínda moito máis acusada desde o día 30- son os motivos que levaron a Sanidade a decretar que Pontevedra pase a ser zona de especial restrición pola COVID-19.
O informe sobre a situación epidemiolóxica de Pontevedra engade que esta situación está derivada dos brotes que se detectaron nos últimos días, sendo a primeira vez que o Sergas os recoñece, xa que ata o de agora a área sanitaria falaba de casos illados.
A taxa de incidencia da COVID-19, segundo confirma a Dirección Xeral de Saúde Pública, aumenta "máis do dobre" a tres e sete días vista e aprecian que a transmisión do virus "pode ser importante", o que obriga a tomar medidas para evitar que a situación se descontrole.
A maior parte dos casos, engade este informe, rexistráronse na cidade de Pontevedra.
En concreto, segundo o servizo de Alertas Epidemiolóxicas, os novos casos disparáronse por reunións e festas entre amigos e familiares. Así, detectáronse oito brotes desde o domingo. Nun deles, uns aniversario, hai catorce persoas afectadas.
Por iso é polo que as principais restricións impostas a Pontevedra céntrense no ámbito social e estean referidas ao tamaño dos grupos, establecendo un máximo de dez persoas en reunións privadas ou limitando a celebración de festas, verbenas ou actuacións.
Ademais, Sanidade considera "oportuno" establecer recomendacións dirixidas á poboación máis vulnerable e medidas de protección nas actividades socioculturais de tipo grupal e de control das agrupacións de persoas en lugares públicos.