A delegada territorial da Xunta de Galicia en Pontevedra, Luisa Piñeiro, atópase actualmente en corentena no seu domicilio tras estar en contacto cunha persoa da súa contorna que deu positivo en covid-19.

Piñeiro, segundo confirmou a Xunta de Galicia, deu negativo na PCR que se lle realizou nas últimas horas, pero terá que seguir confinada para cumprir cos protocolos de seguridade sanitaria.

A súa axenda pública quedará suspendida ata novo aviso.

O goberno galego explica que está previsto que, tras pasar unha nova PCR nuns días, a delegada en Pontevedra poida reincorporarse ao traballo presencial a próxima semana.

Mentres tanto, engade a Xunta no seu comunicado, Luisa Piñeiro traballará de maneira telemática e telefónica desde a súa casa.