O nadal pontevedrés perde a feira de artesanía Pontenadal pola covid-19
Por Redacción
A tradicional feira de artesanía e agasallos que Zona Monumental organiza cada nadal na Praza do Teucro foi suspendida. Pontenadal non se celebrará este ano pola pandemia da covid-19, segundo anunciaron os seus organizadores.
A pesar de que Zona Monumental traballaba na feira desde setembro e xa falara con numerosos artesáns e pedido diferentes orzamentos, aseguran que se viron obrigados a tomar a "triste e moi difícil" decisión de suspendela por "responsabilidade".
"O noso mercado do Nadal é xa un referente na nosa cidade e mesmo en toda Galicia, pero ante o avance da pandemia e as restricións que poderían derivarse proximamente para tratar de contela vémonos na obrigación de cancelala", sinala a organización.
Zona Monumental asegura que "nos dá moitísima pena ter que chegar a tomar esta dura decisión", pero entenden que "o primeiro é a saúde de todos".
Explican que a situación epidemiolóxica desta segunda onda segue empeorando a un ritmo moi preocupante e que mesmo os expertos non saben como evolucionará a pandemia, pero "hai que ter claro que este nadal vai ser moi diferente en moitos sentidos":
Os organizadores confían en que Pontenadal, que ía cumprir vinte anos, poida volver á programación do Nadal da cidade en 2021.