Falece aos 111 anos a pontevedresa Lulú, a avoa de Galicia
Por Oskar Viéitez
María Luisa Vázquez de Silva, coñecida popularmente como Lulú, faleceu esta Noiteboa aos 111 anos.
Esta pontevedresa, nacida o 29 de marzo de 1910, era a cuarta de oito fillos. Un dos seus irmáns morreu poucos meses antes de que ela nacese. Debido á pandemia de gripe española de 1918, asistiu a un internado xunto coas súas irmás. Dous dos seus irmáns, Tito e Quique, loitaron na Guerra Civil Española.
Aos 38 anos casou con Juan José Harguindey pero non tiveron fillos. Pasou os seguintes 24 anos en Santiago de Compostela, ata que o seu marido, que era médico, enfermou e regresaron a Pontevedra.
Lulú era a persoa viva máis lonxeva coñecida en Galicia e a cuarta en España.
A incineración realizouse en privado no crematorio Terras de Pontevedra San Marcos.
O funeral celebrarase o luns día 27 ás cinco e media da tarde na Igrexa parroquial de San Bartolomé.