Tras seis días consecutivos de redución dos casos activos por covid-19, a área sanitaria de Pontevedra e O Salnés experimentou un novo repunte. Hai 7.729 persoas con covid-19, 102 máis que onte. Os novos contaxios foron 627.

Os ingresados nos tres hospitais da área sanitaria son 94, tres menos que este xoves, dos cales seis se atopan na unidade de coidados críticos de Montecelo.

A maiores, atendidos en planta hai outras 88 persoas. Hai 75 en Montecelo, once no Hospital do Salnés e dous no QuirónSalud Miguel Domínguez de Pontevedra.

O resto dos que contraeron o virus, outras 7.635 persoas, atópanse illadas nos seus domicilios e baixo supervisión médica, ao ser asintomáticos ou ter pouca sintomatoloxía.

Desde o inicio da pandemia 39.778 pacientes da área sanitaria superaron a covid-19, 523 nas últimas 24 horas, e rexistráronse 241 falecementos asociados ao virus. O último, un home de 77 anos usuario da residencia de Ribadumia.

En canto á realización de probas PCR, fixéronse na área sanitaria de Pontevedra e O Salnés un total de 384.865, 607 nas últimas horas. A elas súmanse as 214.328 probas de antíxenos e outras 118.966 probas de detección da covid-19.

INCIDENCIA EN GALICIA

O número de casos de coronavirus en Galicia, pola súa banda, é de 68.419, 2.055 máis que o día anterior. Deles, 14.706 son da área da Coruña, 6.927 da de Lugo, 6.986 da de Ourense, 7.729 da de Pontevedra, 18.057 da de Vigo, 10.754 da de Santiago e 3.260 da de Ferrol.

Do total de pacientes positivos, 44 están en UCI, 596 en unidades de hospitalización e 67.779 no domicilio. Por agora, en Galicia hai un total de 334.180 persoas curadas, rexistrándose 2.910 falecementos.

Desde o inicio da pandemia realizáronse en Galicia 3.538.183 probas PCR, 7.140 nas últimas 24 horas. Os novos casos abertos desde onte, que inclúen os autodiagnósticos con antíxenos, foron 6.380.