"Mis hijos me preguntan cuándo viene papá y no sé cómo decirles nada"
Por Natalia Puga & Mónica Patxot
As historias detrás do naufraxio do Villa de Pitanxo esconden verdadeiros dramas, con nomes, apelidos e unha nova realidade que cambiou da noite para a mañá e moitos non saben como afrontar. É o caso de Marluz Esquivel, esposa dun dos tripulantes, Edwin Córdoba, que ten catro fillos moi pequenos aos que non sabe como contar a triste noticia.
E é que a propia afectada relatou a PontevedraViva que non ten esperanzas de que o seu marido apareza con vida, tan só espera que si se localice o seu corpo. "Ya pasó mucho y en el agua bajo cero, entonces...", recoñece resignada. "Ahora mi preocupación es dónde estaba, si en la sala de máquinas... dónde", engade.
"Todavía no puedo asimilar que ya no esté con nosotros", lamenta nunha conversación telefónica con este xornal desde Vigo, onde reside. Pola mañá estivera en Marín, na sede da empresa armadora, e mostrouse visiblemente afectada, sen poder conter as bágoas da emoción.
Tanto en Marín como vía telefónica a súa principal preocupación é de todos os xeitos, a súa familia, os seus catro fillos. O pequeno apenas ten uns meses de vida e o maior aínda non cumpriu os 9 anos. Os outros están ao bordo dos 6 e os 3 anos.
"Mis hijos me preguntan cuándo viene papá y no sé cómo decirles nada", lamenta. "No saben nada y tampoco me atrevo a decirlo", engade. O seu marido leva desde 2020 no mar e os seus fillos xa saben que tarda en regresar, pero saben que nesta ocasión estaba previsto que chegase o 16 de marzo e queren saber cando chega ese día.
Ela non atopa consolo nin palabras. Ademais, por coidar aos seus fillos non se permite perder a compostura diante deles, de modo que cando está soa, se desmorona. Tamén o fixo ás portas da empresa armadora. "Con mis hijos en la casa tengo que seguir aguantando", de modo que, ao deixalos, asáltanlle as bágoas. "Lloro aquí por delante de ellos no puedo", confesou ante os medios de comunicación este mércores.
Vía telefónica relatou que falou co seu marido tan só media hora antes do naufraxio, na madrugada do luns ao martes .Eran as 4.57 horas cando lle dixo por whatsapp "que se iba a trabajar porque había sonado el timbre". Ás 5.24 horas saltaron as primeiras alertas de problemas no buque no Centro Nacional de Coordinación de Salvamento Marítimo en Madrid.
Esta muller tamén se queixa de que xa nas semanas anteriores o seu esposo "me decía que hacía mal tiempo y a pesar de eso trabajaban". Tamén de que durmía moi pouco. Este mércores xuntouse con outras familias de afectados en Vigo e todos facían relatos similares.
Relacionadas:
-
A dor chegou desde o mar e levou as vidas de 21 mariñeiros do Villa de Pitanxo en Terranova
Por Natalia Puga |
-
Os sobreviventes do Villa de Pitanxo chegarán mañá a terra firme
Por Alejandro Espiño & Natalia Puga | Creada e actualizada
-
Marín chora "polos que se foron" nun naufraxio que é un "drama compartido"
Por Alejandro Espiño |
-
O pesadelo dun sobrevivente doutro naufraxio en Terranova: "En 20 minutos el barco se desplomó"
Por Natalia Puga & Mónica Patxot |
-
Un erro no reconto rebaixa a nove os falecidos "oficiais" do Villa de Pitanxo
Por Alejandro Espiño |