O Concello de Pontevedra abre o prazo de recepción de ofertas para a execución do proxecto de reforma dos viais perimetrais da Praza de Barcelos.

Cun orzamento de 2,7 millóns de euros a executar en dúas anualidades, o plan inclúe a reforma integral de todos os servizos soterrados como o saneamento, o abastecemento ou a rega; así como a renovación da iluminación e de parte do arboledo.

Como mellora, o proxecto recolle a recolocación do transformador do centro educativo da praza, que abandonará as dependencias escolares e pasará a estar soterrado mellorando así a seguridade da comunidade educativa. 

Aínda que aínda non existe data para o inicio dos traballos, dependerá do tempo que se alongue o proceso de adxudicación, a idea da concellería de Obras Urbanas que dirixe Demetrio Gómez é que as obras comecen ao longo deste ano. Ademais, os traballos servirán para crear uns 35 empregos.

A intervención nesta céntrica praza, asegura Gómez, supoñerá "unha revolución en superificie e mellorará a calidade de vida dun barrio moi populoso, así como unha mellora para os comerciantes". 

Doutra banda, a tramitación da construción da futura pista de skate da rúa Rosalía de Castro segue avanzando e desde o goberno local confían en poder dar a coñecer novos detalles nun prazo de dez días. Recentemente o Demetrio Gómez mantivo un encontro con representantes do colectivo de skaters da cidade para realizar probas con diferentes materiais que darán forma a esta plataforma. 

Outra obra que está a sufrir un inesperado atraso é o da reordenación do tráfico do barrio de O Castañal. As razóns desta dilatación está na dificultade do Concello para recibir novos sinais de tráfico, que se fabrican con aluminio, un material que escasea no mercado pola crise na subministración de materias primas e que está a retardar outras intervencións como a da desembocadura do Gafos ou a propia pista de skate.