Vinte proxectos empresariais innovadores maduran no quinto coworking de Vilanova de Arousa
Por Redacción
A Xunta de Galicia busca favorecer o emprendemento de vinte proxectos empresariais na comarca do Salnés a través da quinta edición do Espazo Coworking de Vilanova de Arousa, que se desenvolve dende finais do primeiro trimestre no Pazo de Vista Real.
O delegado territorial da Xunta en Pontevedra, Luis López, acompañado polo alcalde, Gonzalo Durán, e do tenente de alcalde, Javier Tourís, coñeceu esta mañá as iniciativas que se están a impulsar da man do director, Ramón Tubío, e do equipo de titores, que acompañaron e apoiaron 76 proxectos nas catro edicións anteriores dos que xurdiron 38 novas empresas e 55 postos de traballo creados na bisbarra arousana.
Na actualidade, neste Espazo Coworking están en marcha vinte proxectos, dos cales 12 están impulsados por mulleres e tres por emigrantes retornados, de sectores moi diversos e con posibilidades de éxito pola demanda e necesidades do mercado, como o turismo de aventura, a creatividade, os produtos do mar, a economía dixital, a alimentación, o deporte, a sostibilidade, as axencias de viaxes, o paisaxismo, o enoturismo, comunicación e eventos, patronaxe, a fotografía especializada, o turismo de luxo, o aloxamento ou a industria musical, entre outros.
“O crecemento empresarial e a xeración de riqueza en Galicia, que van moi por riba da media nacional nos últimos anos, non é casualidade e débese ao valor e inxenio dos emprendedores e ao apoio transversal da Xunta que, no caso da xente máis nova e das ideas máis creativas, plásmase neste apoio, sobre todo no ámbito rural, con case 400 empresas creadas e máis de 600 empregos a través dos Espazos Coworking”, explicou o representante autonómico.