As Cebolas de Ouro de Sanxenxo, para o Grupo Froiz e Pilar Leiro
Por Redacción
Sanxenxo recuperará este ano a cerimonia de entrega dos premios Cebolas de Ouro, cos que se distinguen a persoas ou entidades que garden unha vinculación especial co municipio na súa traxectoria vital ou profesional.
Na cerimonia que terá lugar o próximo 4 de setembro, con motivo da celebración de Santa Rosalía, os galardoados serán o Grupo Froiz, en recoñecemento ao seu fundador Magín Froiz, e Pilar Leiro, veciña de Padriñán e propietaria do histórico ultramarinos que levaba o seu nome.
Ambos pertencen ao sector da alimentación e son recoñecidos tanto pola súa calidade humana como profesional, segundo destacan desde o Concello de Sanxenxo.
Froiz, fundada en 1968, é unha empresa dedicada á venda por xunto e polo miúdo de produtos frescos, alimentación, adega e droguería, a través da súa rede comercial formada por supermercados, hipermercados, cash&carry, franquías e tenda en liña.
A súa actividade desenvólvese en España e Portugal. En España, está presente en Galicia, Castela e León, Castela-A Mancha e Madrid.
En Sanxenxo conta con tres supermercados, dous en Sanxenxo e un en Portonovo.
A empresa colabora ademais ao longo do ano con distintas actividades realizadas no municipio e participou activamente durante os meses máis duros da pandemia coa iniciativa levada a cabo desde o Concello para a repartición de máscaras.
Pilar Leiro, de 93 anos, recibirá a Cebola de Ouro por ser unha veciña comprometida e axudar aos seus veciños desde o seu pequeno ultramarinos situado en Padriñán.
Con apenas catro anos aprendeu a ler e a escribir grazas á súa madriña que lembra "se foi moi cedo". Casou con 20 anos e tivo catro fillos homes. "Quixen unha nena, pero non houbo forma", subliña a homenaxeada.
Xunto ao seu marido abriu un pequeno ultramarinos onde había de todo. "Tiñamos dende sacos de cemento ata sacos de patacas", sinala, aínda que os seus inicios laborais están vinculados á costura casa por casa.
"Cando o meu marido enfermou, pois entón fíxenme eu cargo da tenda e de todo", asegura Pilar, que rememora como "había moita xente necesitada e, claro, que lle fiei a moitos veciños. Os cartos en moitos casos non os recuperei, pero había que axudar a quen podía".
Para Pilar, a discreción foi a máxima para que o seu negocio funcionase. "A boca non só está para falar tamén para saber tea pechada", asegura. Agora son moitos os veciños que agradecen a súa implicación e a súa bondade en tempos duros e difíciles en España.
O alcalde de Sanxenxo, Telmo Martín, sinala que son dous Cebolas de Ouro "ben merecidas" e que recollen á perfección o "espírito e esencia" destes premios.
Relacionadas:
-
As Cebolas de Ouro 2023 son para a doutora Adriana Nieva e o enxeñeiro da NASA Fernando Abilleira
Por Redacción |
-
Trasladan a Feira da Cebola ao parking do porto deportivo ante a previsión de chuvia
Por Redacción |
-
Sanxenxo recupera o seu tradicional programa festivo de San Xinés e Santa Rosalía
Por Redacción |
-
A Feira da Cebola non se perde o arranque de setembro en Sanxenxo
Por Redacción & Mónica Patxot |