A hepatite autoinmune, unha enfermidade rara con "incidencia alta" na área sanitaria pontevedresa
Por Redacción
A hepatite autoinmune, clasificada dentro do grupo das enfermidades raras, ten unha "incidencia alta" na área sanitaria de Pontevedra e O Salnés, na que hai rexistrados 80 pacientes en seguimento.
Así o deu a coñecer este luns o Sergas, que explica que desde hai anos o servizo de aparello dixestivo en Pontevedra colabora con centros de toda España no rexistro e busca activa de hepatite autoinmune e colanxite biliar primaria, doenzas hepáticas crónicas de orixe autoinmune cuxa causa non é aínda clara.
Dentro deste traballo en hepatite autoinmune, o servizo de aparello dixestivo acaba de participar nun estudo sobre hepatite autoinmune publicado na prestixiosa revista científica internacional Hepatology.
A doutora Indhira Pérez Medrano, hepatóloga do Servizo de Dixestivo do Complexo pontevedrés asociada ao Instituto de Investigación Sanitaria Galicia Sur, é a terceira asinante deste estudo que esclarece a mellor abordaxe ante o brote inicial desta hepatite.
A publicación deste estudo supón un novo paso para mellorar o tratamento das persoas afectadas por esta enfermidade, para a que non se coñece cura.
A hepatite autoinmune é unha patoloxía que cursa con brotes que son controlados habitualmente mediante corticoides e tratamento inmunosupresor. Ata o de agora, as guías oficiais europeas recomendaban a budesonida coma alternativa en primeira liña á prednisona, sendo este último medicamento o máis utilizado tradicionalmente.
A publicación deste estudo amosa que, mentres que o tratamento tradicional presenta máis efectos secundarios, a súa alternativa é menos eficaz pero máis segura, unha información de alto valor para poder indicar o tratamento máis adecuado segundo o perfil do paciente.
A doutora Indhira Pérez Medrano explica que a través da revisión sistemática de casos na área sanitaria tratados cun e outro corticoide, "agora temos mellores datos para establecer o perfil clínico idóneo para esta liña de tratamento".
Esta conclusión chega tras unha exhaustiva revisión de casos clínicos de dous anos na que o Complexo Hospitalario Universitario pontevedrés foi un dos principais achegando datos de pacientes.
Relacionadas:
-
O Plan galego de eliminación da Hepatite-C é un "referente mundial"
Por Redacción |
-
A nai coraxe que busca dar visibilidade á síndrome de Noonan "porque a min ninguén mo contou"
Por Natalia Puga & Mónica Patxot |
-
Cando a ter unha enfermidade rara se suma a incerteza e a peregrinaxe en busca dun diagnóstico
Por Natalia Puga |
-
Os premios Best in Class 2022 son recibidos como un "recoñecemento" ao traballo en equipo dos profesionais da área sanitaria
Por Anxo Lourido |
-
Hai 120 pacientes na área sanitaria de Pontevedra diagnosticados con colanxite biliar primaria
Por Redacción |