Máis de 250 "gangas" desde 2.000 euros no salón do coche usado de Pomóvil
Por Redacción
Pomóvil, segunda parte. Tras celebrar o pasado fin de semana a súa modalidade de coche novo, con vendas aceptables, pero pouco público, o Salón do Automóbil de Pontevedra intentará mellorar o seu resultado nos tres días dedicados ao coche usado e de ocasión. Esta segunda modalidade da feira celebrarase ata o vindeiro domingo 11 de novembro no Recinto Feiral de Pontevedra.
Nel, os concesionarios que participaron en Pomóvil hai uns días porán á venda uns 250 vehículos de segunda man, que segundo a Cámara de Comercio de Pontevedra venderanse a partir dos 2.000 euros. Todos estes coches chegan a Pomóvil revisados e con garantías mínimas de 12 meses e ademais das vendas, inclúen os papeleos e burocracias correspondentes.
A entidade cameral, organizadora do Salón do Automóbil, espera que esta modalidade do coche usado e de ocasión permita aos concesionarios mellorar as expectativas económicas que depositaron na feira, e que se superen os 120 coches que se venderon directamente durante Pomóvil, na edición do pasado ano.
Para esta modalidade de Pomóvil mantéñense os mesmos horarios de visita, é dicir de 10:30 a 14:00 e de 16:00 a 21:00. O que cambiará é a súa entrada que xa non será de balde. Para acceder á feira, os interesados terán que abonar un euro por persoa.