Petición directa a José Flores, xerente da área sanitaria, para que aumente o número de facultativos en Poio
Por Redacción
José Flores, xerente da área sanitaria de Pontevedra - O Salnés, participaba este luns na primeira reunión do Consello Local de Sanidade deste goberno local que lidera Ángel Moldes no Concello de Poio.
Os representantes dos grupos municipais do PP e do BNG asistiron ao encontro e tamén membros das asociacións de Campelo, Raxó, Lourido e O Vao.
Flores destacou que os tres centros sanitarios de Poio - Anafáns, Combarro e Raxó - contan co 100% das prazas cubertas. Asegurou que xa se detectan melloras na atención ao normalizar aos poucos as citas e xustificou os problemas que persisten nos atrasos provocados durante a ausencia dalgún dos facultativos.
Representantes dos colectivos solicitaron unha maior previsión para evitar que o consultorio de Raxó permaneza sen atención durante o verán. O xerente manifestou que, durante as próximas semanas, incorporarase o médico titular e adquiriu o compromiso de revisar a situación deste espazo médico para garantir a atención sanitaria nun lugar que experimenta un incremento de poboación nos meses de verán.
Ángel Moldes, que presidía o Consello, pediu un incremento do número de facultativos que atenden o municipio. Flores explicou que se atenderá esta petición cando se constrúa o novo centro de saúde.
Ese novo centro de saúde continúa pendente de que o Concello poña ao dispor do Sergas o solar que reúna as condicións de accesibilidade e espazos necesarios para a construción. O alcalde Ángel Moldes indicou que o goberno local estuda o custo da vía que se incluíu na proposta realizada polo goberno tripartito anterior. O rexedor expuxo que este vial foi proxectado nunha zona rochosa e con desnivel, polo que é preciso realizar catas para axustar o orzamento á obra prevista.
Relacionadas:
-
Protesta do BNG de Poio porque o goberno local do PP rexeita fretar buses para a manifestación pola sanidade pública
Por Redacción |
-
O BNG propón un plan de choque para a situación "dramática" da sanidade
Por Redacción |
-
Anuncian a incorporación de cinco novos médicos de familia para os centros de saúde da área sanitaria
Por Redacción |
-
Preparan tres novos aparcamentos disuasorios en San Salvador para preto de 200 turismos
Por Redacción |
-
O luns haberá obradoiros na rúa para aprender a facer unha reanimación cardiopulmonar
Por Redacción |
-
Activan un plan especial de aparcamento en Combarro pola ponte festiva
Por Redacción |
-
O xerente da área reunirase coa mesa local de Sanidade de Poio
Por Redacción |
-
Concentracións en defensa dunha Atención Primaria de calidade
Por Mónica Patxot & Redacción |
-
Novas mobilizacións en Poio para esixir un servizo sanitario "digno"
Por Redacción |
-
Poio volve insistir a Sanidade para que "axilice ao máximo" a tramitación do novo centro de saúde
Por Redacción |