A Deputación reparte un millón de euros entre 1.244 grupos culturais afeccionados
Por Redacción
Máis de 30.000 persoas participan no Plan Cultural da Deputación para o ano 2014 dentro das 1.244 formacións culturais que recibirán axudas a través deste servizo que pretende promover as actuacións musicais, teatrais e de maxia en distintos concellos da provincia.
Segundo expuxeron o presidente da Deputación, Rafael Louzán, e a deputada responsable de Cultura, Ana Isabel Vázquez, neste programa invístese un millón de euros e, nesta edición, apuntáronse 120 grupos máis que en 2013. O Plan Cultural cobre 23 modalidades diferentes, entre as que destacan as musicais coa presenza de 185 masas corais, 141 grupos de gaitas e 140 agrupacións folclóricas, ademais de 126 formacións de pandereteiras.
Durante a presentación do plan para este ano, Rafael Louzán anunciou que nas próximas semanas se fará público un plan especial para apoiar aos grupos culturais profesionais, en colaboración cos concellos. Este plan estase a negociar neste momento e responde o "momento extraordinariamente difícil" que, segundo o presidente da Deputación, atravesa o sector cultural.