O Museo conmemora o cuarto centenario da morte de El Greco
Por Redacción
O Museo de Pontevedra sumase á conmemoración do cuarto centenario de El Greco con visitas comentadas ás obras do seu taller e actividades orientadas ao público infantil.
As actividades infantís levan por título 'Quen foi O Greco?' e celebaranse os días 14, 15 e 16 de abril. Trátase de obradoiros dirixidos a nenos de entre 6 e 10 anos que buscan dar a coñecer este pintor e crear nos máis novos interese pola pintura, a creación artística e as coleccións do Museo.
Os participantes visitarán as dúas obras do taller de El Greco que posúe o Museo (Expulsión de los mercaderes del templo e San Pedro y San Pablo) e, por medio de xogos e actividade plástica, achegaranse á concepción particular que tiña da cor, das formas e doutros elementos artísticos, así como á súa biografía.
No caso das actividades para adultos, desenvolveranse os xoves 3, 10 e 24 de abril ás 18.30 horas e os días 17 e 18 ás 12.00 horas. O persoal do Gabinete Didáctico do Museo de Pontevedra fará visitas comentadas ás dúas obras do artista, que se atopan en exposición permanente no primeiro andar do edificio Castro Monteagudo, nas Salas de Pintura Española.
Para participar nas actividades é preciso inscribirse a través da dirección de correo electrónico gabinetedidactico.museo@depo.es, ou ben chamando ao teléfono 986 804 100, extensión 42413.