Sete librerías participarán na Feira do Libro Novo malia que "non é rendible"
Por Anxo Lourido
As Feiras do Libro de Galicia comezan a súa programación de 2015 en Pontevedra, cunha nova edición que se desenvolverá do 14 ao 19 de abril. Trátase dunha cita cos lectores que servirá de acto previo ao Día do Libro, o 23 de abril. O paseo Antonio Odriozola e a praza da Ferrería acollen unha ampla programación de actividades con presentacións de novidades editoriais, contacontos, obradoiros de ilustración, de maxia e de linguaxe de signos, recitais poéticos e sesións de sinaturas de autores como Fina Casalderrey, Manuel Lourenzo González, Xesús Constela, Mariano Fisac ou Sonia Mirón.
O pregón correrá a cargo do presidente da Fundación Filgueira Valverde e fillo do escritor, Xosé Fernando Filgueira, durante o acto de inauguración previsto para o día 14 ás 19 horas. O Secretario Xeral de Cultura, Anxo Lorenzo, e a presidenta da Federación de Librarías de Galicia, Pilar Rodríguez, indicaron na presentación que se desenvolveu no Concello de Pontevedra que esta Feira contará co lema "A historia en letras" como referencia a Xosé Filgueira Valverde, o intelectual pontevedrés ao que se dedica o Día dás Letras Galegas deste ano.
Ao longo destas xornadas desenvolveranse diferentes obradoiros e a Biblioteca de Pontevedra trasladará as súas actividades de animación á lectura á Ferrería.
FEIRA "NON RENDIBLE"
A presidenta da Federación de Librarías de Galicia sinalou que os libreiros levan sen ofrecer varios anos datos dos movementos económicos que se rexistran durante esta cita coa lectura "porque as caídas de vendas eran bestiais". E apuntou neste sentido que a Feira se recuperara hai tres anos en Pontevedra por interese dos libreiros en fomentar estas actividades grazas á axuda das institucións e co obxectivo de que o libro saia á rúa "pero non é rendible".
Neste sentido, engadiu que en Pontevedra segue existindo a demanda dos expositores dunha mellor situación das casetas. Pilar Rodríguez afirmou que lles gustaría máis situar as casetas nas proximidades aos soportais da praza da Ferrería. A concelleira de Cultura, Anxos Riveiro, apuntou ante esta suxestión que a situación depende da compatibilidade con outras actividades que se desenvolvan na praza.
Relacionadas:
-
'Cegoñas no fondo da ría', os artigos de Manuel Lourenzo publicados en PontevedraViva chegan á Feira do Libro
Por Mónica Patxot & Anxo Lourido |
-
Comeza a Feira do Libro Novo con Filgueira Valverde como referencia
Por Anxo Lourido |
-
Xosé Filgueira Valverde será o autor homenaxeado no Día das Letras Galegas 2015
Por Redacción |