O vicepresidente da Deputación de Pontevedra, César Mosquera anunciou que o Museo rehabilitará os históricos edificios de García Flórez e Castro Monteagudo pero apraza a conexión subterránea destes inmobles da praza da Leña co edificio Fernández López.

A decisión de adoptou este mércores nunha reunión "monográfica, longa e intensa" do Consello Asesor do Museo que tamén acordou suspender a construción dun edificio para Arqueoloxía en Valdecorvos. 

Segundo explicou César Mosquera este "replantexamento" dos proxectos en marcha débese a dúas cuestións, en primeiro lugar a compra do convento de Santa Clara por parte do Concello de Pontevedra coa intención de cedelo para que forme parte dos edificios do Museo.

E o segundo motivo é a falta de "implicación" económica por parte da Xunta e do Estado que limita as posibilidades de investimento. "Non temos ningunha garantía de que haxa colaboración doutras administracións", engadiu.

O vicepresidente provincial indicou que o Consello Asesor considera "estratéxico" que Santa Clara pase a formar parte da institución cultural, o que supoñerá sumar 5.427 metros cadrados de superficie, segundo as estimacións iniciais coas que traballa a Deputación. "Abre unhas posibilidades enormes", dixo Mosquera mentres que a reforma proxectada nos edificios históricos tan só sumaría preto 2.000 metros nos tres edificios.

Agora a Deputación traballa nun proxecto de rehabilitación por fases dos antigos edificios do Museo. Empezando coa recuperación  urxente" do García Flórez e do Castro Monteagudo e deixando proxectada a construción dos polémicos sotos.

A folla de ruta a seguir agora será avanzar na rehabilitación nunha primeira fase de conexión entre o García Flórez e o Castro de Monteagudo, deixando para unha segunda fase a posibilidade de unión mediante un grande soto co Fernández López.

Nos próximos días manterase unha reunión co departamento de Patrimonio, presentarase un proxecto para as conexións verticais dos dous inmobles e realizarase o estudo das catas arqueolóxicas para realizar o proxecto final da primeira conexión.

Ao tempo, continuarase na aprobación da modificación do Peprica, que terá o visto bo inicial previsiblemente en dúas semanas, e pedirase a licencia de obra.

Sobre o destino destes dous inmobles orixinais do Museo, César Mosquera adiantou que o Castro Monteagudo acondicionarase como espazo didáctico, e o García Flórez "en principio manterase en reserva para algunha exposición puntual", pechadas en si mesmas e que non precisen relación ou continuidade co resto das coleccións do Museo. 

"Seguro que é caro porque é unha rehabilitación complexísima", recoñeceu o vicepresidente da Deputación de Pontevedra que espera poder empezar cos traballos "se pode ser, este ano".