O escritor e xornalista Salvador Rodríguez inicia este martes o ciclo 'A biblioteca íntima de...'
Por Redacción
Desde este mes de xaneiro ata abril, catro persoas coñecidas de Bueu vinculadas ao mundo dos libros falarán sobre as súas bibliotecas persoais nunhas charlas que se desenvolverán coa intención de fomentar a lectura.
O ciclo 'A biblioteca íntima de...', organizada pola Biblioteca Municipal Torrente Ballester, era presentada por Alberto Moital, concelleiro de Patrimonio, Arquivo e Bibliotecas; e por José Ramón Núñez, bibliotecario municipal.
As citas serán os martes a partir das 20.30 horas na Sala Multiusos Centro Social do Mar con entrada libre.
A primeira sesión chega este martes 24 da man de Salvador Rodríguez, xornalista e escritor. O 21 de febreiro, a crítica literaria María Inés López Volpe falará sobre os libros que lle marcaron; o libreiro Xosé Banqueses ofrecerá a súa exposición o 21 de marzo e, por último, o 18 de abril o profesor Salvador Castro ofrecerá datos sobre os seus libros favoritos.