Carolyn Wonderland causa baixa no Festival de Jazz e será substituída por Gisele Jackson and The Shu Shu's
Por Anxo Lourido
Un problema de saúde da artista Carolyn Wonderland obriga a suspender o concerto que estaba previsto da artista de Houston dentro do XXIX Festival Internacional de Jazz e Blues de Pontevedra, segundo informan desde a organización.
No seu lugar, ao escenario da praza da Ferrería subirase o luns 7 ás 22.30 horas unha das voces máis relevantes da música afroamericana actual, Gisele Jackson, acompañada pola súa banda The Shu Shu’s.
Esta intérprete naceu en Baltimore e iniciouse musicalmente no soul clásico. A súa transcendencia pública chegou cando Ray Charles a incorporaba á súa banda para convertela nunha raelette, unha corista nos seus concertos. Tamén Donna Summer e James Brown incorporaron a súa voz en numerosas gravacións e concertos en directo.
Ademais participou como teloneira de Bette Midler, The Commodores, Tito Puente ou B-52. Participou nunha campaña comercial televisiva de Johnnie Walker e na película 'The First Wives Club' ('O club das primeiras esposas') de 1996.
Actuou na inauguración presidencial de Bill Clinton e tamén, con frecuencia, en Broadway en musicais como 'Dream Girls', 'Purlie' ou 'Carmen Jones'. Logrou o número tres na lista de baile de Billboard co clásico 'Love Commmandments'.
En Pontevedra estará acompañada pola súa banda formada por David Wilkinson á guitarra, Abel Boquera, no órgano Hammond e Caspar St. Charles na batería. O seu concerto será unha viaxe entre o soul clásico, o blues de Memphis e o funk con incursións no house e o dance.
Relacionadas:
-
O festival de jazz baixa o pano coa actuación da banda pontevedresa Mr. River Night Court
Por Redacción & Mónica Patxot |
-
Gisele Jackson and The Shu Shu's prende A Ferrería
Por Mónica Patxot & Oskar Viéitez |
-
Do 7 ao 11 de agosto, blues e soul vibrarán na Ferrería no 29º Festival Internacional de Jazz e Blues
Por Anxo Lourido |
-
Carolyn Wonderland, Acantha Lang e Vanessa Collier, as estrelas internacionais para o Festival de Jazz e Blues
Por Alejandro Espiño |
-
Pontevedra busca ser un "fervedoiro" cunhas Festas de Verán convertidas no 'Pontevedra Verán Fest'
Por Alejandro Espiño & Mónica Patxot |
-
O Festival de Jazz de Pontevedra cambia xullo por agosto e será a antesala das Festas da Peregrina
Por Alejandro Espiño |